Alþjóðleg stemning mun ríkja í Stúdentakjallaranum næstu tvo dagana.
Fimmtudaginn 24, apríl, sumardaginn fyrsta, verður uppistand á ensku í Stúdentakjallaranum með bandaríska uppistandaranum, grínistanum og leikaranum Keith Michael Ashton.
Keith, sem er alinn upp í Brooklyn, New York, hefur komið fram í bandarísku sjónvarpi, m.a. á CBS, BET og Comedy Central. Hann lauk BA-námi frá New York University en býr og starfar í Los Angeles. Keith er staddur hér á landinu með unnustu sinni, en hún er gestafyrirlesari í kínverskum fræðum hjá Konfúsíusarstofnun við Háskóla Íslands.
Föstudaginn 25. apríl verða tónleikar í Stúdentakjallaranum með kanadíska tónlistarmanninum David Porteous.
David, sem býr í Toronto, er þrítugur tónlistar- og kvikmyndagerðarmaður. Hann hefur samið tónlist fyrir fjölda kvikmynda og hlotið fyrir það ýmsar viðurkenningar og tilnefningar. Hann er nú staddur á Íslandi við upptökur á nýrri tónlist. Upptökurnar fara fram í hljóðverinu Sundlauginni.
Báðir viðburðirnir hefjast kl. 21 en aðgangur er ókeypis og allir eru velkomnir.