Dr. Gunni falsaði kaupsamning

„Einu sinni falsaði ég kaupsamning á íbúð í Grindavík og náði einhverri fúlgu út, skjálfandi á beinunum fyrir framan einhverja stranga konu á skrifstofu úti í bæ,“ viðurkennir Gunnar Lárus Hjálmarsson, betur þekktur sem Dr. Gunni, á vefsvæði sínu.

Gunnar Lárus skrifar þar færslu um skyldusparnað og minnist þess að þegar hann hóf að vinna á níunda áratug síðustu aldar hafi hann þurft að greiða 15% af lanum í skyldusparnað. Hægt var að fá þennan sparnað greiddan út, til dæmis ef viðkomandi keypti sér húsnæði.

Í færslu sinni segir Gunnar Lárus að úr því brot hans sé fyrnt geti hann viðurkennt það. „Einu sinni falsaði ég kaupsamning á íbúð í Grindavík og náði einhverri fúlgu út, skjálfandi á beinunum fyrir framan einhverja stranga konu á skrifstofu úti í bæ. Ég skil eiginlega ekki hvernig ég gat verið svona kræfur. Svo fór peningurinn auðvitað allur í fyllirí og rugl.“

Hann tekur reyndar fram að einnig hafi verið hægt að fá sparnaðinn út ef viðkomandi gekk í hjónaband. „Þetta kom auðvitað aldrei til greina fyrir mig því ég var svo mikill lúði og þekkti engar stelpur og hafði litla reynslu af þeim.“

Vefsvæði Gunnars Lárusar

• Blogga um frétt