Símafyrirtækið NOVA setti upp skemmtistað á toppi Esjunnar í dag. Guðmundur Arnar Guðmundsson, markaðsstjóri NOVA, telur að rúmlega þúsund manns hafi mætt en að um 200 til 300 manns hafi verið á skemmtistaðnum hverju sinni.
Farið var með stórar hátalarastæður, rafstöð og fleira á topp Esjunnar en viðburðurinn stóð yfir frá klukkan 11 til 13.30 í dag. Viðburðurinn var meðal annars hugsaður sem hvatning fyrir fólk sem hefur langað að ganga á Esjuna en hefur ekki lagt í það enn.
„Þetta var hrikalega vel lukkað miðað við hvað það er mikil raun að fara þarna upp,“ segir Guðmundur, aðspurður hvernig til tókst.
„Okkur fannst það tilvalið í góðu veðri að fara með stærsta skemmtistað í heimi á topp Esjunnar,“ segir hann.
Að sögn Guðmundar bauð þyrlufyrirtækið Helo upp á far með þyrlu á Esjutopp gegn vægu gjaldi. Hann segir að um þriðjungur gesta hafi nýtt sér þá þjónustu.