Skilgreining verkefnis

Um er að ræða samkeppni um viðskiptaáætlanir þar sem horft er til hugmyndaauðgi annars vegar og skipulegrar framsetningar og röksemdafærslu hins vegar. Markmiðið er að allir þátttakendur hafi ávinning af átakinu þótt aðeins fáir vinni til beinna verðlauna. Þátttakendur hafa tæpa tvo mánuði frá upphafsdegi til að ljúka viðskiptaáætlun sinni og fá margháttaðan stuðning á tímabilinu. Óháðir sérfræðingar munu dæma innsendar áætlanir. Vegleg verðlaun eru í boði fyrir sigurvegarana, en aðal sigurvegarinn fær auk einnar milljónar króna í reiðufé leiðsögn hjá KPMG og Viðskiptaháskólanum í eitt ár eftir að keppni lýkur. KPMG er eitt af stærstu og virtustu endurskoðunar- og ráðgjafafyrirtækjum í heimi og er KPMG hér á landi stórt og öflugt fyrirtæki.

Vel unnin viðskiptaáætlun er mikilvæg forsenda fyrir því að fyrirtæki með álitlegar hugmyndir nái árangri. Ferlið við að semja áætlunina er afar mikilvægt í því sambandi. Hinu er heldur ekki að leyna, að ef vel er að verki staðið aukast líkurnar á aðkomu fjárfesta.

Þeir sem taka þátt í samkeppninni og nýta sér til fulls þá leiðsögn sem í boði er munu hafa hag af því -- hvort sem þeir vinna til verðlauna eður ei.