Lux Inflecta hlaut fyrstu verðlaun

Úrslit í samkeppninni Nýsköpun '99 voru kynnt í Iðnó fimmtudaginn 20. maí. Alls bárust 82 áætlanir í samkeppnina og fór þátttaka fram úr björtustu vonum.

Viðskiptaáætlun fyrir fyrirtækið „Lux Inflecta“, sem ætlunin er að þrói og markaðssetji notendaviðmótið Giza sem á að einfalda verklag við Java-tölvuforritun, einkanlega Java-forritun í dreifðri vinnslu, hlaut fyrstu verðlaun, 1.000.000 krónur, auk leiðsagnar sérfræðinga KPMG og Viðskiptaháskólans í eitt ár, í samkeppninni Nýsköpun '99, samkeppni um viðskiptaáætlanir. Að verkefninu stóðu þrír ungir menn, þeir Alfreð Þórðarson, Birgir Finnsson og Þorbjörn Njálsson.

Önnur verðlaun, 500.000 krónur, hlaut viðskiptaáætlunin „Spaksmannsspjarir“, en hún fjallar um stofnun fyrirtækis sem ætlunin er að markaðssetji íslenska hönnun fatafyrirtækisins Spaksmannsspjara á erlendum mörkuðum, en það er rekið af hönnuðunum Björgu Ingadóttur og Valgerði Torfadóttur. Viðskiptaáætlunina unnu fjórar ungar konur, þær Edda Björk Guðmundsdóttir, Sara Lind Þorsteinsdóttir, Auður Björk Guðmundsdóttir og Halla Tómasdóttir.

Fimm viðskiptaáætlanir lentu jafnar í þriðja sæti og hlaut hver þeirra 100.000 króna verðlaun, en þær eru „Hraðbraut“, „Hlíðarfjall“, „Flugtaskan“, „Kine ehf.“ og „Albúm“.

Nýsköpunarsjóður atvinnulífsins, Viðskiptaháskólinn í Reykjavík, KPMG Endurskoðun hf. og Morgunblaðið stóðu í sameiningu að samkeppninni Nýsköpun '99 og var tilgangurinn að hvetja fólk með ófullgerða hugmynd að atvinnurekstri til að setja saman viðskiptaáætlun utan um hugmynd sína með skipulegum hætti, til að efla hjá fólki hæfni og þor til að stofna til nýrrar atvinnustarfsemi, og örva með því nýsköpun í íslensku atvinnulífi.

Jafnræði kynjanna tímanna tákn
Davíð Oddsson forsætisráðherra afhenti verðlaunin og sagði við það tækifæri að það væri sérstaklega gaman að því að fólk alls staðar að af landinu hefði fundið sig knúið til að taka þátt í þessu verkefni, og einnig athyglisvert og vonandi tímanna tákn að það væri sáralítill munur á þátttöku karla og kvenna í samkeppninni. „Það kæmi mér ekki á óvart, eftir að hafa heyrt lýsingar hjá tveimur forsprökkum verkefnisins, að mörg fyrirtæki ættu eftir að spretta upp úr þessari keppni hér í dag. Það var nefnt að framhald yrði á og ég vona að jafnvel strax í næstu samkeppni verði hægt að líta til fyrirmyndanna sem sáu dagsins ljós í dag, fyrirmynda sem þá verði orðnar að fyrirtækjum sem þessi keppni hafi gefið af sér,“ sagði Davíð Oddsson.

Guðfinna S. Bjarnadóttir, rektor Viðskiptaháskólans í Reykjavík, stjórnaði athöfninni. Í ávarpsorðum sínum í upphafi verðlaunaafhendingarinnar sagði Guðfinna m.a. að þrjú orð væru henni ofarlega í huga að lokinni þeirri vinnu sem að baki lægi við mat á innsendum viðskiptaáætlunum.

„Við vorum í meiriháttar virkjanaframkvæmdum í fimm mánuði við virkjun hugvits. Það eru þrjú hugtök sem standa upp úr eftir að við erum búin að fara gegnum allar þessar hugmyndir. Eitt þeirra er „hugvit“. Næsta hugtak er „alþjóðavæðing“ en í þessum viðskiptaáætlunum var ekki horft til eyþjóðarinnar Íslands þar sem við værum að markaðssetja fyrir hvert annað, heldur var þetta alþjóðlegt. Og þriðja hugtakið er „tækni“,“ sagði Guðfinna S. Bjarnadóttir.

Páll Kr. Pálsson, formaður verkefnisstjórnar samkeppninnar, sagði í ávarpi sínu m.a. að fyrirtæki á borð við Nýsköpunarsjóð lifði á stöðugu innstreymi viðskiptaáætlana, til að skapa eftirspurn eftir þjónustu sjóðsins, og kom fram í máli hans að það hefði verið meðal ástæðna þess að ráðist var í samkeppnina Nýsköpun '99.

Í máli Páls Kr. og Guðfinnu kom fram að 650 manns hefðu skráð sig til leiks og fengið í hendur leiðbeiningargögn, 400 manns hefðu setið námskeiðin um gerð viðskiptaáætlana sem var langt umfram það sem vonast hafði verið eftir. 82 viðskiptaáætlanir bárust, 40 frá körlum, 30 frá konum og 12 frá fyrirtækjum.

„Gerir forritun dreifðrar vinnslu einfaldari“
Að viðskiptaáætluninni sem lenti í fyrsta sæti standa Alfreð Þórðarson verkfræðingur, Birgir Finnsson tölvunarfræðingur og Þorbjörn Njálsson kerfisfræðingur.

„Við erum að fara að skrifa Java- umhverfi sem einfaldar netforritun til muna. Þetta kerfi köllum við Giza og það gerir sérstaklega dreifða vinnslu einfaldari en það er oft mjög flókið þegar maður er að skrifa slík kerfi. Í kerfinu er álagsdreifing, það er ýmislegt sem kemur þar að eins og gagnagrunnar og slíkt sem við hjúpum algerlega svo að notandinn þarf ekki að kunna á það skrifa kerfi í Giza,“ segir Alfreð Þórðarson í samtali við Morgunblaðið.

Varðandi framtíðarsýn næstu tólf mánuði segir Birgir Finnsson að fyrir þeim liggi að þeir stefni að því að framkvæma verkefnið. „Við reiknum með því að þróun á kerfinu taki okkur allt að einu ári. Samhliða henni mun markaðsstarf hefjast. Okkar sýn er því sú að þegar kerfið er tilbúið verðum við tilbúnir að fara með það á markað.“

Þorbjörn Njálsson segir að verkefnið sé í þróun. „Við erum ekki byrjaðir að forrita kerfið en hönnunarvinnan er í fullum gangi.“

„Höfum mikla trú á þessum fatnaði“
Að viðskiptaáætluninni um Spaksmannsspjarir standa fjórar konur sem kynntust þegar þær voru við nám í Bandaríkjunum, og allt frá þeim tíma hafa þær haft í huga að stofna fyrirtæki saman. Edda Björk Guðmundsdóttir er viðskiptafræðingur, Sara Lind Þorsteinsdóttir er fjölmiðlafræðingur, Auður Björk Guðmundsdóttir er fjölmiðlafræðingur og Halla Tómasdóttir er alþjóðaviðskiptafræðingur.

„Verkefnið gengur út á að selja og markaðssetja íslenska hönnun Spaksmannsspjara á alþjóðlegum mörkuðum, en Björg og Vala hafa unnið í hönnun í einhverju formi í tíu ár. Við komum að þessu með viðskiptalegu hliðina í huga og tókum að okkur þetta verkefni að búa til áætlun um að selja þessa hönnun. Við áætlum að byrja í Kaupmannahöfn með eigin verslun og stækka svo út í helstu stórborgir heimsins,“ segir Halla Tómasdóttir í samtali við Morgunblaðið.

Varðandi framtíðarsýn verkefnisins til næstu 12 mánaða segir Sara Lind að núna vanti þær fjármagnið til að framkvæma verkefnið.

Að sögn fjórmenninganna voru þær farnar af stað með eigin hugmynd í samkeppnina þegar þær ákváðu að vinna viðskiptaáætlun fyrir Björgu og Valgerði í Spaksmannsspjörum. „Þær eru góðar kunningjakonur okkar og við erum líka góðir viðskiptavinir hjá þeim. Við höfum mjög mikla trú á þessum fatnaði sem hefur einnig vakið athygli erlendis og fengið fjölda fyrirspurna erlendis frá.“

Fimm viðskiptaáætlanir saman í þriðja sæti
Þær fimm viðskiptaáætlanir sem lentu jafnar í þriðja sæti fjölluðu um viðskiptahugmyndir á gerólíkum sviðum, en þær eru:

„Hraðbraut“, unnin af hjónunum Ólafi Hauki Johnson viðskiptafræðingi og Borghildi Pétursdóttur framkvæmdastjóra. Verkefnið gengur út á stofnun nýs framhaldsskóla, Hraðbrautar, sem myndi bjóða úrvals nemendum að ljúka stúdentsprófi á tveimur árum í stað fjögurra.

„Hlíðarfjall“, unnið af Sigrúnu B. Jakobsdóttur. Hlíðarfjall hf. er fyrirtæki sem hugmyndin er að muni byggja og reka svifbraut og veitingastað á brún Hlíðarfjalls ofan Akureyrar, en þaðan er m.a. hægt að njóta einstaks útsýnis yfir Eyjafjörð og næsta nágrenni, ganga á skíðum eða á tveimur jafnfljótum og njóta annarrar afþreyingar.

„Flugtaskan“, unnin af Jóni Sigfússyni en flugtaskan er hugsuð sem lítil pappaaskja í formi ferðatösku sem hafi að geyma konfektmola af fínustu gerð ásamt litlum auglýsingamiðum frá aðilum sem þjónusta ferðamenn, og væri flugtöskunni dreift með kaffinu til flugfarþega.

„Kine ehf.“ unnið af dr. Þórði Helgasyni verkfræðingi, Baldri Þorgilssyni verkfræðingi og Ásmundi Eiríkssyni verkfræðingi. Verkefnið fjallar um fyrirtækið Kine ehf. sem ætlað er að þróa, framleiða og markaðssetja hreyfigreini, sem er tæki ætlað fyrir heilbrigðisgeirann til að skoða hreyfingar fólks.

„Albúm“, unnið af Kolbeini Sigurjónssyni, Tryggva Sch. Thorsteinssyni og Þorvaldi Inga Jónssyni. „Albúm-stafrænt skipulag“ er forrit sem heldur utan um rafrænar myndir sem fólk geymir í tölvunni sinni.