Sandgerði. www.mats.is

Sandgerðisdagarnir verða haldnir hátíðlegir dagana 27. – 29. ágúst næstkomandi.  Í tilkynningu kemur fram Sandgerðisdagar eru fjölskylduhátíð bæjarbúa í Sandgerði og bjóði Sandgerðingar gesti velkomna í bæinn til að taka þátt í herlegheitunum með sér.  Litaglaðir bæjarbúar skreyta hús sín og götur en hverfum bæjarins hefur verið skipt upp eftir litunum gulur, rauður, grænn og blár.

Fram kemur að framkvæmdanefnd Sandgerðisdaga hafi unnið hörðum höndum við að gera hátíðina fjölskylduvæna og skemmtilega og bjóða upp á fjölbreytta dagskrá þar sem allir ættu að geta fundið eitthvað við sitt hæfi. Fjölmargir aðilar leggja hátíðinni lið, íbúar, félagasamtök, íþróttafélög og fyrirtæki. 

Dagksráin hefur nú birst í heild sinni á www.sandgerdisdagar.is og á www.245.is en verður dreift í hvert hús í Sandgerði eftir helgi.
Mánudaginn 24. ágúst verður karlakvöld í lauginni og þriðjudaginn 25. ágúst verður kósýkvöld hjá konum í lauginni.

Miðvikudaginn 26. ágúst verður skólasetning Grunnskólans í Sandgerði auk þess sem nýtt skólahúsnæði verður vígt.  Um kvöldið verður róleg kvöldstund í Safnaðarheimilinu með Lundi og hljómsveitinni Klassart úr Sandgerði. 

Á fimmtudagskvöldinu verður hin margumtalaða Lodduganga, Aftan festival hópurinn stendur fyrir tónleikum á Vitanum og uppistand á Mamma mía.

Formleg setning hátíðarinnar verður í Safnaðarheimilinu föstudagskvöldið 28. ágúst kl. 20.00 þar sem tónlistarfólk úr Sandgerði og fleiri flytja fagra tóna og önnur skemmtilegheit. 

Laugardaginn 29. ágúst verður mikið um að vera.  Meðal annars verður hverfakeppni í litbolta, markaðstjald, ýmsar uppákomur í Púlsinum, listasýningar, dorgveiðkeppni, Sandgerðistuddinn, Bjarni töframaður, Lísa í Idol, Björgvin Franz og Dofri dvergur, hæfileikarík börn úr Sandgerði leika og syngja, auk þess sem Skítamórall mætir á svið og tryllir lýðinn.  Götu- og hverfagrill eru fastur liður í hátíðinni fyrir kvöldskemmtunina og lýkur með hverfagöngu að hátíðarsviðinu.

Um kvöldið kom í heimsók félagarnir Gunni og Felix, kveikt verður í varðeldi og harmonikkufélagið leikur fyrir gesti.  Hápunktur kvöldsins verður þegar Hobbitarnir úr Sandgerði spila fyrir bryggjuballi þar til dagskrá lýkur á hátíðarsviði með sprengjum og eldingum að hætti björgunarsveitarinnar Sigurvonar úr Sandgerði. 

Eftir dagskrá á hátíðarsviði tekur við skemmtun á skemmtistöðum bæjarins, Mamma mía og Vitanum auk þess sem Skítamórall leikur fyrir dansi í Samkomuhúsinu. 

Á sunnudeginum er hægt að fara í hvala- og höfrungaskoðun með Eldingunni II, opið hús verður í Miðhúsum og nýr og betri Grunnskóli verður opinn fyrir gesti og gangandi.