Vél Flugfélags Íslands flýgur yfir Öskjuhlíðina mbl.is/Ómar

Í þriðja skiptið á jafnmörgum árum fór fjöldi flugvéla um íslenska flugstjórnarsvæðið yfir 100 þúsund markið, heildarfjöldinn á síðasta ári var 101.504 þúsund flugvélar. Ef miðað er við árið 2008 þá dróst flugumferð saman um 8% en þá fóru 110.366 flugvélar um íslenska flugstjórnarsvæðið og höfðu aldrei orðið fleiri.

Að meðaltali 278 flugvélar á dag

Um 24.4 % flugumferðarinnar voru flugvélar í flugi til eða frá Íslandi en árið 2008 var þessi tala 27,8%. Að meðaltali komu 278 flugvélar á dag inn á svæðið.

Flugumferðin var mest í ágúst eða tæplega 12 þúsund flugvélar. Eins og búast mátti við voru flugvélar Icelandair tíðustu gestirnir inn á svæðinu, sem er 5,4 milljónir ferkílómetrar að stærð. Því næst komu í réttri röð þýska félagið Lufthansa, British Airways, United Airlines og Delta Airlines,  að því er segir í tilkynningu frá Flugstoðum.

Flugleiðin á milli London - Los Angeles var sú flugleið sem var oftast flogin inn á flugstjórnarsvæðinu, því næst London - San Francisco og þriðja algengasta flugleiðin var frá Kaupmannahöfn til Keflavíkur.

Boeing flugvélar komu oftast inn á íslenska flugstjórnarsvæðið á síðasta ári og voru í þremur efstu sætunum, flestar voru Boeing 777-200, í öðru sæti Boeing 767-300 og í þriðja sæti var Boeing 757-200, að því er segir í tilkynningu frá Flugstoðum.