„Í landkynningu gildir að umfjöllun, jafnvel þótt neikvæð kunni að vera, sé betri en engin. Áhugi erlendis á Íslandi í dag er mikill, meðal annars vegna mikillar umfjöllunar fjölmiðla ytra um erfiðleika okkar í efnahagsmálum. Það virðist samt ekki hafa áhrif á ímyndina, áhugi fólks í ferðaþjónustu á landinu hefur sjaldan verið meiri,“ segir Steinn Lárusson, sem stýrir ferðakaupstefnunni Mid-Atlantic sem hófst í Laugardalshöll í gær.

Um 350 fulltrúar koma á ráðstefnuna frá útlöndum, þar af um 150 kaupendur ferðaþjónustu frá Bandaríkjunum og Kanada. Þeir sem taka þátt í kaupstefnunni eru fulltrúar ferðaskrifstofa, hótela, bílaleigna, skemmtigarða og margvíslegra annarra ferðaþjónustufyrirtækja – og að auki taka þátt ferðamálaráð á Norðurlöndum og þeim svæðum og borgum sem Icelandair flýgur til í Norður-Ameríku.

Miklar framfarir

Icelandir stendur að kaupstefnunni, sem nú er haldin í 18. sinn. „Framfarirnar í ferðaþjónstunni eru miklar, sérstaklega afþreyingarþátturinn. Þar er fjölbreytnin mikil, til dæmis jeppaferðir í ýmsum útfærslum, jöklaleiðangrar og jaðarsport ýmiskonar. Þá er verið að þróa sífellt nýja möguleika til dæmis í gönguferðum. Og þetta skilar sér í því að ferðamönnum sem hingað koma að utan fjölgar jafnt og þétt, þótt ýmsir áhrifaþættir aðrir spili líka inn í, svo sem hagstætt gengi krónunnar og umfjöllun erlendra miðla um land og þjóð,“ segir Steinn.

Eftirtekjan líklega drjúg

Steinn bætir við að afrakstur kaupstefnu, eins og þeirrar sem nú stendur yfir, sé fyrst og fremst sá að kaupendur og seljendur þjónustu beri saman bækur sínar undir þeim formerkjum að maður sé manns gaman. Nú sé sölu á ferðum fyrir sumarið 2010 að mestu lokið og því komi eftirtekjan ekki strax í ljós, en verði að líkindum drjúg þegar upp er staðið.