Ferðamenn á BSÍ.

Ferðaþjónustuaðilar á landsbyggðinni  og bílaleigur sem Samtök ferðaþjónustunnar (SAF) hefur haft samband við hafa margir hverjir ekki fundið fyrir þeirri miklu fjölgun sem orðið hefur á erlendum ferðamönnum á þessu ári og spyrja sig hvar ferðamennirnir séu.

Hægt er að svara því á þá leið að í fyrsta lagi er mikil fjölgun á erlendum ferðamönnum á höfuðborgarsvæðinu í skemmri ferðum en einnig hefur framboð af þjónustu aukist um allt land, að því er fram kemur í fréttabréfi SAF.

Erlendum ferðamönnum hefur fjölgað umtalsvert á árinu og standa vonir til að heildarfjölgun á árinu verði um 20% eða 600.000 erlendir ferðamenn í heildina.  Ferðamönnum frá Norður-Ameríku hefur fjölgað langmest eða um 59% en fjölgun er frá öllum markaðssvæðum.  Samkvæmt talningu Ferðamálastofu hefur fjölguninn fram til loka júlí verið 19,6%, en í júlímánuði var fjöldi ferðamanna rétt undir 100.000 sem er met fyrir þann mánuð og búast má við að fjöldinn fari í fyrsta sinn yfir 100.000 nú í ágúst.

„Ljóst er að bæta þarf upplýsingagjöf varðandi fjölda erlendra ferðamanna á landinu og nauðsynlegt að fá betri upplýsingar um dvalartíma og ástæðu dvalar.
Framboð gistirýmis hefur aukist víðast hvar á landinu bæði í þéttbýli og dreifbýli.

Hagstofa Íslands gefur  út gistináttatölur fyrir allar tegundir gististaða aðeins einu sinni á ári en birtir allt árið mánaðarlegar tölur um fjölda gistinátta fyrir heilsárshótel. Samkvæmt þeim tölum hefur gistinóttum á heilsárshótelum fjölgað um 11,4% á fyrstu 6 mánuðum þessa árs en heildaraukningin er mest á höfuðborgarsvæðinu eða 13,6 á meðan gistinóttum á landsbyggðinni fjölgar aðeins um 6%.

Hjá Umferðastofu eru nú skráðir 8.689 bílaleigubílar en voru 7.123 fyrir ári. Aukningin á sér stað bæði á nýjum og notuðum bílum. Samkvæmt upplýsingum frá Vegagerðinni hefur skráðum rekstrarleyfum fyrir bílaleigur fjölgað úr 94 í 112 eða um tæp 20," segir í fréttabréfi SAF.