Tjaldsvæðið við Þórunnarstræti mbl.is/Hjálmar

Talsverð fækkun varð á fjölda gistinátta á tjaldsvæðunum á Akureyri nú í sumar, en þeim fækkaði alls um tæplega 7.400 á milli ára. Gistinætur urðu samtals um 34.300 á móti um 41.700 á síðasta ári.

„Þess ber þó að geta að árið 2010 var metár í fjölda gistinátta á tjaldsvæðum bæjarins," segir Tryggvi Marinósson, framkvæmdastjóri Útilífsmiðstöðvarinnar á Hömrum, í viðtali við Vikudag. 

Hann segir að fækkun hafi orðið í öllum mánuðum sumarsins en mest í júní, þá fækkaði þeim um tæplega 4.800, í júlí nam fækkunin um 1.500 gistinóttum og í ágúst um 700. Gistinóttum Íslendinga fækkaði samtals um 10.500 en á móti kom fjölgun erlendra gesta um 3.100. „Þessa fækkun má trúlega rekja til kulda í byrjun sumars en við urðum einnig áþreifanlega vör við áhrif af háu eldsneytisverði. Vegna kalskemmda og bleytu var tjaldsvæðið við Þórunnarstræti ekki opnað fyrr en 21. júní sem er rúmlega tveimur vikum seinna en venjulega. Vegna aðgerða við að bæta úr skemmdunum og vegna þess að sumarið var hæfilega rakt þá náði grasið sér furðu vel en þó eru víða stórir blettir sem þarfnast frekari lagfæringa," segir Tryggvi í viðtali við Vikudag.