Verðlaunin afhent. (f.v.) María Guðmundsdóttir, fræðslufulltrúi SAF, Árni Gunnarsson, formaður SAF, Katrín Jakobsdóttir, menntamálaráðherra, og Ragnheiður Valdimarsdóttir, mannauðsstjóri Iceland Travel.

Starfsmenntaviðurkenningu Samtaka ferðaþjónustunnar (SAF) í ár hlýtur ferðaskrifstofan Iceland Travel. Alls bárust níu tilnefningar til verðlaunanna sem nú eru veitt í fimmta sinn. Dómnefnd, sem skipuð er þeim Maríu Guðmundsdóttur, upplýsinga- og fræðslufulltrúa SAF, Ingibjörgu Guðmundsdóttur, framkvæmdastjóra Fræðslumiðstöðvar atvinnulífsins, og Ólafi Jónssyni, sviðsstjóra Matvæla- og veitingasviðs Iðunnar fræðsluseturs, tók allar tilnefningar til umfjöllunar. Eftir yfirferð sem byggði á greiningu þess sem lagt var til grundvallar matinu og stefnu SAF, varð ein þeirra fremst meðal jafningja.

Til grundvallar ákvörðunar dómnefndar að velja ferðaskrifstofuna Iceland Travel liggja m.a. eftirtalin atriði: 

• Starfsfólk  skynjar að það sé hluti af innri gildum fyrirtækisins og hefur skilning á mikilvægi þekkingaruppbyggingar og símenntunar
• Stjórnendur Iceland Travel líta á endurmenntun sem lykilatriði í viðhaldi starfsánægju innan fyrirtækisins
• Virkri endurmenntunarstefnu hefur verið fylgt og menntunarstig hefur markvisst verið aukið í fyrirtækinu sl. 6. ár
• Þekkingaröflun og miðlun er heildstæð í fyrirtækinu
• Frammistöðumat, sem sýnir þjálfunar- og menntunarþörf starfsmanna, er framkvæmt
• Áhersla er lögð á einstaklingsmiðað nám samhliða vinnu. Boðið er upp á sveigjanlegan vinnutíma meðan á námi stendur, fjárhagslega styrki og umbun fyrir góðan árangur
• Hugað er að vellíðan og heilsueflingu starfsfólks í samvinnu við fyrirtækið Hrif
• Fyrirtækið leggur mikið upp úr samfélagslegri ábyrgð og hefur m.a. látið útbúa myndband í því skyni að vekja fólk til umhugsunar um náttúru Íslands og hefur með því skapað sér ákveðið forskot meðal alþjóðlegra samtaka í ferðaþjónustu
• Fyrirtækið hefur náð ákveðnu samkeppnisforskoti með beinum hætti gegnum markvissa símenntunarstefnu