Íslenska fálkaorðan föl fyrir 180.000 kr.

Það þykir eftirsóknarvert að hljóta hina íslensku fálkaorðu. Ef þú vilt raunverulega gleðja þann sem þér þykir vænt um gæti þetta verið rétta gjöfin. Allavega ef manneskjan á allt en inni á síðunni Brask og brall er hægt að kaupa gripinn. 

Forseti Íslands sæmir íslenska ríkisborgara fálkaorðunni tvisvar á ári, 1. janúar og 17. júní.

„Orðuþegar hvert sinn eru að jafnaði ríflega tugur. Þá sæmir forseti árlega nokkra erlenda ríkisborgara fálkaorðu. Sérstakar reglur um orðuveitingar eru í gildi milli Íslands og örfárra ríkja í Evrópu um gagnkvæmar orðuveitingar í tengslum við opinberar heimsóknir þjóðhöfðingja. Samkomulag um þessar orðuveitingar er við öll löndin á Norðurlöndum, Þýskaland, Frakkland, Bretland, Ítalíu og fáein ríki önnur. Í tengslum við slíkar heimsóknir verða orðuveitingar til erlendra ríkisborgara talsvert fleiri en að ofan greinir.

Orðustigin eru nú fimm:

Fyrsta stig orðunnar er riddarakrossinn og flestir orðuþegar eru sæmdir honum. Annað stigið er stórriddarakross, síðan stórriddarakross með stjörnu og loks stórkross. Æðsta stig orðunnar er keðja ásamt stórkrossstjörnu en hana bera einungis þjóðhöfðingjar. Gefist tilefni til getur orðunefnd hækkað einstakling um orðustig. Öllum er frjálst að tilnefna einstaklinga sem þeir telja verðuga orðuþega. Sérstök nefnd, orðunefnd, fjallar um tilnefningar til orðunnar og gerir tillögur til forseta um hverja skuli sæma henni. Nánari upplýsingar um starfsemi orðunefndar veitir orðuritari og hann veitir einnig viðtöku tillögum um orðuveitingar. Orðuritari er nú ávallt starfandi forsetaritari.
Tillögur með tilnefningum verða að berast með formlegum hætti, skriflegar og undirritaðar. Þar skal rekja æviatriði þess sem tilnefndur er og greina frá því starfi eða framlagi til samfélagsins sem talið er að sé þess eðlis að heiðra beri viðkomandi fyrir það með fálkaorðunni. Fleiri en einn geta undirritað tilnefningarbréf en aðalreglan er að undirskrift eins nægir. Orðunefnd berast á hverju ári um 80-100 tilnefningar. Við andlát þess er fálkaorðuna hefur hlotið ber erfingjum hans að skila orðuritara orðunni aftur,“ segir á vefnum forseti.is.

Þeir sem eiga 180.000 krónur í lausu geta þó eignast fálkaorðuna því eitt stykki af henni er til sölu inni á síðunni Brask og brall á Facebook.

„Íslensku Fálkaorðuna. Ef þú vilt raunverulega gleðja þann sem þér þykir vænt um gæti þetta verið rétta gjöfin. Allavega ef manneskjan á allt,“ segir í auglýsingunni. 

Þegar Smartland Mörtu Maríu hafði samband við seljanda orðunnar kom í ljós að hún var keypt á uppboði í Bretlandi. 

Fálkaorðan er föl fyrir 180.000 kr.

Orðunefnd skipa eftirfarandi:

Guðni Ágústsson, fv. ráðherra, formaður orðunefndar
Ellert B. Schram, fyrrv. alþingismaður og fyrrv. forseti ÍSÍ
Rakel Olsen, framkvæmdastjóri
Ólafur Egilsson, fyrrv. sendiherra
Þórunn Sigurðardóttir, leikstjóri
Örnólfur Thorsson, orðuritari

• Blogga um frétt