Lærðu að útbúa skrímsli og kynjaverur

NN Make Up Studio útskrifaði á dögunum sinn annan hóp í brelluförðun eða „special effect“-förðun, en skólinn sérhæfir sig í stuttum förðunarnámskeiðum fyrir einstaklinga og fagfólk.

Á námskeiðinu lærðu nemendur að vinna við kvikmyndir og leikhús, en þaulreyndir kennarar með áralanga reynslu í faginu miðluðu af reynslu sinni. Nemendur lærðu allt sem viðkemur SFX-förðun, svo sem að útbúa sár, ör, uppvakningaförðun, öldrun og grímur. Þá lærðu nemar einnig grundvallaratriðin á bak við karakterhönnun og handrit.

Sigríður Rósa Bjarnadóttir og Steinunn Þórðardóttir kenna við skólann, en þær eru báðar starfandi við fagið. Steinunn hlaut meðal annars Edduna fyrir förðun og gervi í Málmhaus en Sigríður Rósa vann fjölda ára í þjóðleikhúsinu, Latabæ og fleiri verkefnum svo eitthvað sé nefnt.

Fyrir útskrift unnu nemendur að lokaverkefni þar sem þeirra karakter var myndaður í ljósmyndaveri, en eins og sjá má var sköpunargleðin við völd.

Hér má sjá myndband frá námskeiðinu, sem er hreint ekki kræsilegt.