Smartland Mörtu Maríu | mbl | 24.7.2015 | 10:00

Heiðrún Hödd elskar Louis Vuitton

Heiðrún Hödd Jónsdóttir nemi í íslensku og fjölmiðlafræði við Háskóla Íslands.

Heiðrún Hödd Jónsdóttir er 24 ára gömul og leggur stund á nám í íslensku og fjölmiðlafræði við Háskóla Íslands. Hún hefur alltaf haft mikinn áhuga á öllu sem tengist fallegri hönnun og heldur úti blogginu CORE. Heiðrún elskar að ferðast, borða góðan mat og huga að heilbrigðum lífsstíl og er það ásamt hönnun í brennidepli á blogginu.

Hvað er það seinasta sem þú keyptir þér og elskaðir?

„Elska allt sem kemur frá Louis Vuitton og þegar ég fór þangað fyrir nokkrum vikum keypti ég mér Louis Vuitton Agenda og þar sem ég er ansi skipulagsóð var það auðvitað mjög mikilvægt að ég eignaðist eina slíka.“

Heiðrún er mikið fyrir Louis Vuitton. Instagram @heidrunhodd

Í hverju ætlar þú að fjárfesta næst?

„Hope" ljósið frá Luceplan. Er að safna mér fyrir því hægt en örugglega!“

Hope ljósið frá Luceplan sem Heiðrúnu dreymir um.

Hver er uppáhalds hluturinn þinn?

„Ég á mér kannski ekki einhvern einn uppáhalds hlut en er ansi hrifinn af Kate Moss myndinni minni sem er tekin af Mario Testino og prýðir einn vegginn í svefnherberginu mínu, Kate í allri sinni 100 x 70 cm dýrð.“

Hvað er ógleymanlegasti staður sem þú hefur ferðast til á seinasta ári?

„Náttúruleg hitaböð innan um ótrúlega fallega hella í litlum bæ rétt fyrir utan Budapest, upplifun sem ég mun seint gleyma.“

Heiðrún elskar að ferðast. Instagram @heidrunhodd

Hver er besti minjagripur sem þú hefur tekið með þér úr ferðalagi?

„Keypti Buddha-styttu á spænskum markaði sem kostaði mig heilar 300 krónur en er ein af mínum uppáhalds og er hið mesta augnayndi á heimilið.“

Hvaða hlut myndir þú aldrei láta frá þér?

„Systur mínar, Unnur og Ástríður gáfu mér eitt sinn ótrúlega fallegt Tiffany & Co. hálsmen með upphafsstöfunum mínum sem mér þykir óendanlega vænt um, líkt og systur mínar.“

Seinasta máltíð sem þú naust virkilega að borða?

„Á indverska staðnum Kashmir sem er í Debrecen, Ungverjalandi. Ég borðaði fyrir fjóra það kvöld.“

Eðalblanda - ostar, ávextir og te. Instagram @heidrunhodd

Hver er sá munaður sem þú gætir aldrei sleppt?

„Að ferðast! Upplifa nýja staði og menningu, það er alltaf jafn gaman og gefandi.“

Hver er seinasti aukahlutur sem þú keyptir þér?

„Kerti frá Byredo í Madison Ilmhús, er alltaf með kveikt á kertum, hvort sem það er sumar eða vetur og Byredo kertin eru með þeim betri! Ilmurinn einstaklega góður og svo eru þau líka svo falleg til að skreyta heimilið með.“