Kynheilsa: Reglulegir ástarleikir geta dregið úr kvefi og flensu

Aldrei er góð vísa of oft kveðin og því um að gera að minna fólk á að reglulegar „líkamsæfingar“ í svefnherberginu eru góðar bæði fyrir líkama og sál. Nú hafa rannsóknarmenn við hinn bandaríska Wilkes University sýnt fram á að nemendur sem elskuðust í það minnsta einu sinni eða tvisvar í viku, og stunduðu að sjálfsögðu ábyrgt kynlíf, höfðu hærra innihald af ónæmisglóbúlíni í líkamanum. Það er heiti á próteinum sem hafa það sameiginlegt að vera virk mótefni sem meðal annars geta ráðast gegn kvefi og flensusýkingum.

Ekki nóg með þetta heldur ku reglulegt ástarlíf líka geta aukið lífsgæði okkar og jafnvel lengt lífið. Niðurstöður rannsókna frá University of Bristol sýndu einhver tengsl á milli reglulegra fullnæginga og lífslíkna karlmanna á aldrinum 45 til 59 ára í Suður-Wales. Loks má benda á að ástarleikir hafa jákvæð áhrif á hormónabúskap líkamans. Þá ku vera betra að halda sér í æfingu til að æxlunarfærin haldi áfram að virka vel.

Ástareldur kryddar kynlífið. mbl.is/Purity Herbs