Fín líkamsrækt að þrífa bílinn

Að púla í ræktinni eða stunda aðra líkamsrækt þarf ekki að vera það eina sem brennir kaloríum yfir daginn. Gott er að hugsa til viðbótar allt það sem maður gerir á degi hverjum eins og t.d. að rölta út í búð eða ganga upp stigann á þriðju hæð heima hjá sér.

Húsverkin eru líka góð leið til að fá dálitla útrás og púla um leið. Ef þú þurrkar rösklega af í hálftíma brennir þú 80 kaloríum, ef þú moppar gólfið á sama hátt í korter brennir þú 70 kaloríum og jafnvel aðeins meiru ef þú setur allt alveg á fullt. Á meðan þessu stendur er gott að setja einhverja hressandi og skemmtilega tónlist á fóninn og skúra, skrúbba og bóna svo af miklum móð.

Þrífðu bílinn af krafti

Ef þú vilt frekar gera eitthvað utandyra er tilvalið að drífa sig í að þrífa bílinn. Gerir þú það vel og vandlega og þrífur bílinn hátt og lágt jafnt utan sem innan ættir þú að geta brennt allt að 500 kaloríum. Ef þú ákveður að vera enn duglegri þann daginn og bóna bílinn líka bætist við þennan fjölda. Svo er nú skemmtilegt frá því að segja að það að undirbúa máltíð getur brennt nokkrum kaloríum þegar þú beygir þig upp og niður til að opna ofninn, þeytist um eldhúsið og kannski inn í stofu til að leggja á borðið. Þá er líka gott að spila einhverja skemmtilega tónlist til að dilla sér dálítið og syngja með.

Ekki það að kaloríur skipti okkur öll endilega miklu máli en það er dálítið skemmtilegt að velta fyrir sér hvað hversdagslegar athafnir sem við hugsum lítið um geta bætt við ágætis hreyfingu. Það safnast jú allt þegar saman kemur. Þessar upplýsingar er að finna á bresku vefsíðunni ivillage.co.uk.