Svona áttu að forðast blöðrubólgu

Það getur verið sársaukafullt að fá þvagfærasýkingu en megineinkennin eru tíðar ferðir á salernið, sviði eða sársauki við þvaglát og verkir fyrir ofan lífbein. Auk þess getur þvagið verið gruggugt.

Samkvæmt Doktor.is er blöðrubólga sýking í þvagblöðrunni en heitið er oft notað ef sýking eða erting myndast í neðri hluta þvagfæra.

Algengasta orsök blöðrubólgu er sýking af völdum þarmabaktería - sérstaklega hjá konum því þær hafa mun styttri þvagrás en karlmenn. Þvagrásarop þeirra liggur nálægt endaþarmsopinu.

Ástæða þess að konur fá þvagfærasýkingu gæti einfaldlega verið rangar hreinlætisaðferðir við klósetferðir. Heppilegast er að konur þurrki sig í áttina frá þvagrásaropinu og aftur að endaþarmsopinu til að forðast að bakteríur frá endaþarminum fari í þvagrásina.

Mikilvægt er að drekka mikið svo að blaðran skolist vel og að hún tæmist alveg við þvaglát. Einnig er talið að líkur á blöðrubólgu minnki ef fólk klæðir sig vel. Gott ráð er einnig að fara á salernið og tæma blöðruna strax eftir samfarir því með því skolarðu burt þær bakteríur sem gætu hafa komist í þvagrásina. Tæmið blöðruna reglulega - helst þriðju hverja klukkustund. Konur með „partíblöðru“ eru í meiri hættu á að fá blöðrubólgu. 

• 1 blogg um fréttina

Bloggað um fréttina

• Jóhannes Ragnarsson: Erindi í Feministafélaginu Sumargjöf