„Tinna og Tóta höfðu samband við stjórnvöld og stungu uppá því að „leiðréttingar-cashið“ yrði látið í þeirra hendur. Þær myndu gera lífstíls-fræðsluefni fyrir þjóðina og spara Landspítalanum milljónir. Alþingi var þögult og engin svör bárust úr ráðuneytum landsins. Tinna og Tóta þurfa þína aðstoð,“ segja þær Tinna og Tóta inni á vef Karolina Fund.
Á bak við Tinnu og Tótu eru þó raunverulegar manneskjur eða Anna Hafþórsdóttir og Bylgja Babýlons. Hugmyndin að Tinnu og Tótu kviknaði á prikinu í apríl 2012 og stuttu síðar voru þær farnar að gera grínþætti sem þær settu inn á youtube.com. Síðasta vor gengu þær til liðs við sjónvarpsstöðina Bravó og gerðu átta þætti með framleiðslufyrirtækinu Stórveldið. Að því loknu gerðu þær „pælot-þætti“ með Stórveldinu en þættirnir komust ekki í sýningu.
„Sjónvarps-stjórnunar fólkið í landinu var ekki tilbúið til að taka áhættuna sem því fylgir að setja nafn sitt við heilsu-byltingu svo Tinna og Tóta sátu úti í kuldanum um hríð.
En þá var líkt og þær fengju hugljómun „allt feita fólkið er nátturlega ennþá á youtube!“ öskraði Tinna og Tóta svaraði: „ó!“
Það hefur aldrei verið neitt leyndarmál að Anna og Bylgja, mæður þeirra T og T hafa ekki verið að græða neina peninga á þeim stöllum og er það ekki tilgangurinn með þessari söfnun heldur. Þeir peningar sem safnast verða notaðir í að borga fyrir eftirfarandi: Spreytan, neglur og augnhár. Síðan þarf tökumann og hljóðmann og hugsanlega/kannski/vonandi ekki að leigja einhverjar græjur. Allur afgangur fer á Tinnu og Tótu reikning og verður geymdur til þess að hægt sé að gera áframhaldandi fræðslu efni í komandi framtíð,“ segir á vef Karolina Fund.
Tinna og Tóta stefna á að gera fjóra þætti og verða nýju þættirnir allir á ensku.
„Vegna þess að ef Björk getur það, þá getum við það!“