Rannsóknir benda til þess að brjóstagjöf geti haft ýmislegt jákvætt í för með sér. Ekki aðeins eru konur sem hafa brjóstfætt börn sín í minni hættu á að þróa með sér krabbamein í brjóstum og eggjastokkum, heldur eru þær í minni áhættu að fá sykursýki 2 og liðagigt.
Tvær rannsóknir sem sýna fram á ágæti þess að hafa börn sín á brjósti birtust nýverið. Önnur þeirra birtist í Annals of Oncology, en samkvæmt henni dregur brjóstagjöf úr líkum á afar illvígri tegund brjóstakrabbameins. Hin birtist í Annals of Internal Medicine, en hún bendir til þess að brjóstagjöf geti endurstillt efnaskipti kvenna eftir þungun, og þar af leiðandi komið í veg fyrir að meðgöngusykursýki verði viðvarandi vandamál.
„Mjólkurkirtlarnir eru vanþroska og ófærir um að sinna starfi sínu, það er að framleiða mjólk, nema að þeir gangi í gegnum fulla meðgöngu. Meðganga neyðir brjóstin til að vaxa úr grasi og fá sér vinnu,“ útskýrði dr. Marisa Weiss, höfundur annarrar skýrslunnar, í samtali við The New York Times.
Það þarf því ekki að undra að vísindamenn séu farnir að kalla brjóstagjöf fjórða stig meðgöngunnar.