Handtöskur kvenna hafa löngum verið karlmönnum mikil ráðgáta, en nýlega kom í ljós að mjölið sem margar konur geyma í pokahorninu er mun skítugra en flestir höfðu gert ráð fyrir.
Nýleg þýsk rannsókn leiddi í ljós að í handtöskum megi búast við að finna í kringum 10.000 bakteríur, á aðeins nokkurra fersentímetra svæði. Til að setja þetta í samhengi er hin dæmigerða klósettseta langtum hreinni.
En hvað veldur?
„Hunda- og kattahland er það versta, en við þurfum að vera í hönskum til að fjarlægja lyktina því annars fer okkur að klæja í húðina,“ sagði starfsmaður fyrirtækis sem sérhæfir sig í hreinsun á handtöskum og bætti við að margir laumi rusli ofan í töskuna og steingleymi því svo.
Til að stemma stigu við miklum sóðaskap er ráðlagt að geyma mat í lokuðum umbúðum og þvo sér um hendurnar áður en gramsað er í töskunni. Þá er hugsanlega best að hafa kjölturakkann bara í ól, en ekki í fínu handtöskunni.
Frétt Daily Mail