Þær fæðutegundir sem fylla flokk ofurfæðis eru nokkuð mismunandi. Það getur verið erfitt að skilgreina nákvæmlega hvaða fæðutegundir flokkast sem ofurfæði og hverjar ekki. Hér á eftir verða taldar upp nokkrar fæðutegundir sem teljast til ofurfæðis, samkvæmt síðunni Mindbodygreen, sem þú ættir að hafa í mataræðinu þínu.
Laufgað grænmeti
Hér má til dæmis nefna grænkál, spínat og klettasalat. Allt þetta grænmeti er fullt af kalsíum, trefjum, prótíni og vítamínum. Mikið úrval er til af grænmeti sem þessu á Íslandi og því er um að gera að velja það sem passar best við hverja máltíð.
Avókadó
Avókadó eru full af trefjum, kalíum og hollum fitusýrum. Þau eru best þegar þau eru mjúk að innan en þá eru þau fullkomin í salatblönduna. Gott er að blanda tómötum, rauðlauk, hvítlauk og límónu saman við avókadó og búa þannig til einfalt og gott guacamole.
Hvítlaukur og engifer
Nota þarf lítið af bæði hvítlauk og engifer en þessar fæðutegundir eru báðar afar bragðsterkar. Þá getur engiferið verið gott meðal við magaverkjum en hvítlaukurinn hjálpar þér að losna við kvefið.
Pipar
Pipar er frábær og hjálpar til við að hreinsa allt kerfið. Hann inniheldur mikið af C-vítamínum.
Chiafræ
Chiafræin þarf vart að kynna fyrir fólki en þau hafa verið afar vinsæl undanfarið og ekki að ástæðulausu. Fræin eru full af prótíni, trefjum og omega-3 fitusýrum. Gott er að borða chiafræ í morgunmat eða bæta þeim til dæmis út í smoothie-inn.
Kiwi
Kiwi er fullt af C-vítamínum og frábært millimál. Auðvelt er að grípa kiwi með sér og maður kemst í sumarstemmningu við að borða þennan suðræna ávöxt. Skaðlaust er að borða loðna hjúpinn utan um ávöxtinn en mælt er með því að fjarlægja fyrst hörðu endana.
Dökkt súkkulaði
Allt er gott í hófi og dökkt súkkulaði getur svo sannarlega verið gott fyrir okkur. Súkkulaðið er fullt af andoxunarefnum, trefjum og steinefnum sem við þörfnumst. Farðu og fáðu þér dökkt súkkulaði en passaðu bara að borða ekki of mikið af því.