Það getur verið sérlega erfitt að losa sig við aukakílóin, sérstaklega fyrir konur. Auðvitað eiga margir karlmenn erfitt með að grennast, en að jafnaði er það auðveldara fyrir þá heldur en dömurnar.
Þetta mikla óréttlæti stafar aðallega af tveimur líkamlegum þáttum, líkt og fram kemur í grein Women‘s Health. Í fyrsta lagi eiga karlmenn það til að vera stærri en konur, og með meiri vöðvamassa, sem gerir það að verkum að grunnbrennsla þeirra er hraðari. Í öðru lagi er mikill munur á hormónabúskap karla og kvenna.
Samkvæmt nýlegri rannsókn sem framkvæmd var við Yale-háskólann hafa konur mun meira af estrógeni og prógesteróni í líkamanum, sem getur valdið því að þær fá mun sterkari löngun í mat en karlmenn. Eftir egglos lækkar gildi estrógens í líkamanum, á meðan prógesterón hins vegar rýkur upp. Fram að næstu blæðingum eiga konur það því til að borða allt að 238 fleiri hitaeiningar á dag.
Þar að auki eru vandamál með skjaldkirtil algengari meðal kvenna en karla, en skjaldkirtilshormón hafa mikið að segja þegar kemur að þyngd og efnaskiptum.