Næringarþerapistinn Sölvi Avo Pétursson fer reglulega á safakúra og segir þá gefa sér aukna orku. Sölvi segir hinn mesta misskilning að safakúrar valdi þreytu og orkuleysi og hann vill dreifa boðskapnum. Hann segir frá sinni reynslu af safakúrum í Heilsublaði Morgunblaðsins sem kemur út á föstudaginn.
Sölvi hefur farið á fjölbreytta safakúra í gegnum tíðina. „Ég hef farið í tveggja vikna fljótandi lifrarhreinsun. Svo hef ég tekið djúsvikur þar sem ég er bara á hreinum djús. Þá hef ég líka tekið svokallaðar djús-heilsuföstur með Gló Djúsers-hópnum á Facebook, þar erum við mest á djús en fáum okkur líka þeytinga, súpur og smá salat með.
„Ég fyllist af orku og hef góðan fókus vegna þess að það er minna í gangi í meltingunni. Eins og sérfræðingarnir segja: um leið og líkamanum er gefin hvíld frá meltingunni þá hefur hann meiri orku í að lækna sig og heila. Ég hef fulla trú á að hann geri það ef við bara leyfum honum það,“ segir Sölvi, spurður út í ávinning þess að fara á safakúr.
Viðtalið Við Sölva verður hægt að lesa í heild sinni í Heilsublaði Morgunblaðsins sem fylgir blaðinu 26. ágúst.