Arna Sigrún Haraldsdóttir sat heima hjá sér ólétt í sumar þar sem hún setti sig í samband við framleiðanda Modibodi og ákvað að byrja flytja inn blæðinganærbuxur. Á meðgöngunni dundaði Arna Sigrún sér við það undirbúa vefverslun fyrir Modibodi vörur.
Hugmyndina fékk Arna Sigrún eftir að hún tók eftir því að nærbuxurnar voru orðnar vinsælar erlendis en hún fylgist vel með undirfatabransanum. Undirföt eru sérstakt áhugamál hjá Örnu Sigrúnu enda er hún fatahönnuður að mennt auk þess að vera með MBA-gráðu. Hún segir nærbuxurnar bæði gerðar til að vera til öryggis þegar blæðir mikið og svo bara einar og sér þegar það blæðir minna.
„Ég þekki konu sem sem fór í fullorðinsfimleika eftir að hún átti börn og uppgötvaði sér til mikillar skelfingar að hún gæti ekki hoppað neitt mikið án þess að pissa á sig,“ segir Arna Sigrún. Nærbuxurnar nýtast því líka þeim konum sem eiga í erfiðleikum með þvagblöðruna enda gerðar úr hátæknilegu efni sem dregur í sig vökva.
Þegar viðtalið er tekið er Arna Sigrún komin rúmar 39 vikur á leið og sjálf í þeirri ðstöðu að geta nýtt sér nærbuxurnar. „Það eru líka til óléttunærbuxur af því að óléttar konur eiga stundum erfitt með að halda þvagi. Það er svolítið mikill þrýstingur og svo hnerrar maður og þá bara úpsí,“ segir Arna Sigrún sem sér fram á að geta ekki bara nýtt sér nærbuxurnar heldur líka brjóstagjafabol sem er á leiðinni frá merkinu en bolurinn kemur í veg fyrir að mjólkin leki í gegn en það fer að líða að brjóstagjöf hjá Örnu Sigrúnu.
Blæðingar geta oft verið vandræðalegar og óþægilegar á unglingsárunum og veit Arna Sigrún til þess að unglingsstelpur nýti sér nærbuxurnar. „Ég veit að það er nokkrar unglingsstelpur sem eru voða spenntar að geta prófað. Þær vita kannski ekki hvenær þær byrja á blæðingum. Svo hef ég líka heyrt af mömmum sem kaupa þetta fyrir stelpurnar sínar af því þær grunar að þær geti verið farið að byrja,“ segir Arna Sigrún og bendir á að það sé hægt að nota þessar nærbuxur rétt eins og venjulegar nærbuxur.
Blæðinganærbuxur hafa ekki bara öðlast vinsældir vegna þægindanna heldur líka vegna þess að þær eru umhverfisvænar. Samkvæmt Women‘s Eniviromental Network henda konur gífurlega miklu magni af túrtöppum og dömubindum. Tölur frá Bretlandi sýna að hin venjulega kona notar um 11 þúsund einnota vörur vegna blæðinga. Það er því ekki beint hægt að segja að þær hefðbundnu aðferðir sem vestrænar konur nota séu umhverfisvænar. Talið er að á hverju ári skilji konur í Bretlandi eftir sig 200 þúsund tonn af dömubindum og túrtöppum.