Það er kominn tími til að draga fram gamla góða vöfflujárnið, vöfflur í hárið eru að verða aftur vinsælar. Beyoncé skartaði síðu „vöffluðu“ hári í brúðkaupi Serenu Williams í nóvember og hún er ekki hætt að vinna með hárgreiðsluna.
Á dögunum afhenti söngkonan ruðningskappanum Colin Kaepernick verðlaun í svörtum og silfruðum stuttum kjól frá LaQuan Smith. Hárið var glæsilegt en það má greina smáar bylgjur í hárinu rétt eins og myndast með notkun vöfflujárns. Beyoncé er greinilega búin að skipta um hárstíl í bili en hún hefur bæði skartað sléttu hári sem og miklum liðum.
Í nýjum hárgreiðsluþætti á Smartlandi krullaði hárgreiðslumeistarinn Baldur Rafn Gylfason hárið á Sunnevu Eir Einarsdóttur. Baldur fór jafnframt yfir það hvernig vöfflur væru að koma heitar inn og þá kannski mitt á milli meiri liða.