T-laga veggur breytti heimilinu
Í einu af betri hverfum borgarinnar býr fjögurra manna fjölskylda í huggulegri fjögurra herbergja íbúð. Íbúðin var byggð árið 2004 og völdu húsráðendur allar innréttingar inn í íbúðina. Á gólfunum er eikarparket og fataskápar og innihurðar í sama við. Þegar fjölskyldan flutti inn var stofan, eldhúsið, borðstofan og herbergisgangurinn í einu rými. Húsmóðirin á heimilinu vildi ekki ákveða strax hvernig íbúðin yrði stúkuð niður og ákváðu þau að búa í íbúðinni í svolítinn tíma áður en framhaldið væri ákveðið.
Til að brjóta rýmið upp leituðu þau til Kristínar Brynju Gunnarsdóttur innanhúsarkitekts. Hún hannaði glæsilegan vegg sem stúkar rýmið af þannig að öll svæði njóti sín sem best og sem best nýting væri í öllum rýmum.
Veggurinn, sem er í T-laga, hefur þríþætta nýtingu. Við ganginn lét Kristín Brynja útbúa bekk með skúffum og svo var sett pulla ofan á. Á vegginn var settur spegill og veggljós. Þetta er ekki bara fallegt heldur ákaflega praktískt. Á vegginn í svefnherbergisálmunni setti Kristín Brynja veglega skrifstofuaðstöðu með stóru skrifborði og efri skápum. Það er því hægt að loka alla pappíra inni í skáp. Í stofunni kemur veggurinn vel út því þar voru settar hillur sem fara vel á veggnum.
Húsmóðirin segir að veggurinn hafi gjörbreytt stemningunni á heimilinu.
