Sarah Jessica Parker hefur loksins fundið draumahúsið sitt. Leikkonan og eiginmaður hennar, Matthew Broderick, leituðu lengi að rétta húsnæðinu og fundu loks það sem Parker var að leita að; heimili í anda Carrie Bradshaw úr sjónvarpsþáttunum vinsælu Beðmál í borginni.

Parker og Broderick voru orðin úrkula vonar þegar þau loks rákust á rétta húsið í Bridgehampton á Long Island. Í viðtali við tímaritið ELLE DECORATION segir leikkonan að þau hafi falið vini sínum Eric Hughes að taka húsið í gegn en hann starfaði áður við kvikmyndaframleiðslu og var nýja heimili leikarahjónanna frumraun hans í innanhúshönnun.

„Við vildum að heimilið yrði þægilegt, opið og bjart og mikið um liti,“ segir Parker. „Við treystum Hughes fullkomlega til verksins. Hann notaði tækifærið og lét innrétta sjónvarp í svefnherbergið sem hægt er að fela inni í vegg og líkti þar eftir svefnherbergi Carrie Bradshaw.“