Það var ekki laust við að hjartað tæki aukakipp þegar leikkonan Sarah Jessica Parker opnaði heimili sitt á Hamptons í New York fyrir fáeinum árum. Um er að ræða svona „frístundaheimili“ leikkonunnar í eiginlegum skilningi enda dvaldi hún þar í frítíma sínum.
Þegar ég sá þessar myndir á sínum tíma hugsaði ég með mér að svona ætlaði ég nú aldeilis að hafa heima hjá mér þegar ég yrði stór. Á heimilinu blandar Parker saman IKEA-húsgögnum við fínni húsgögn frá Ralph Lauren og fleiri þekkta hönnuði.
Það sem olli eiginlega mestum aukakipp var speglaskrifborðið sem frú Parker var með í svefnherbergi sínu og notaði sem náttborð. Síðan þá hef ég verið ansi heit fyrir speglahúsgögnum og nota hvern krók og kima til að spegla svolítið upp. Það að vera með slíkan grip í svefnherberginu gerir þetta mikilvægasta herbergi hússins afar sjarmerandi. Svo ekki sé nú minnst á hvað það verður fallegt í herberginu þegar blóm eru komin í vasa og hlutum raðað fallega ofan á.
Í dag þykir afar heitt að blanda saman mörgum ólíkum bláum vösum og ráða þeim saman í hóp. Þessir vasar eru með allskonar mismunandi munstri. Það sem er sjarmerandi við þessa bláu vasa er hvað þeir eru mikið Hamtons-eitthvað. Ef þú vilt bæta smá dassi af Hamtons inn á heimilið þitt þá ættir þú að fá þér munstraða mottu og svo væri ráð að vera með bólstraða borðstofustóla.
Blóm eru líka áberandi á þessum Hamtons-heimilum eins og sést á myndunum. HÉR getur þú skoðað heimili Söruh Jessicu Parker til að fá innblástur.