Listahjónin Íris Eggertsdóttir og Jón Páll Eyjólfsson hafa búið við Hverfisgötu síðan 2001 en nú eru breytingar í vændum en hann var ráðinn leikhússtjóri Leikfélags Akureyrar á dögunum. Nú hafa þau sett íbúðina á sölu en þess má geta að þetta er engin venjuleg íbúð. Hún er meira eins og leikmynd sem búið er að nostra við og á sama tíma er stíllinn hrár og gróður.
Íris hannar fyrir fatamerkið Liber en áður en Jón Páll var ráðinn leikhússtjóri átti hann farsælan feril að baki sem leikari og leikstjóri. Hann útskrifaðist úr East 15 Acting School í London árið 2000 sem leikari og hefur samhliða leikarastarfi leikstýrt og sett saman sviðsverk hjá Þjóðleikhúsinu, Borgarleikhúsinu, Leikfélagi Akureyrar og með sjálfstæðum sviðslistahópum á Íslandi og Danmörku. Hann er einn af stofnendum Mindgroup en uppsetningar þeirra hafa vakið mikla athygli hér heima og erlendis og verið sýndar víða um Evrópu, nú síðast á Norrænum sviðslistadögum í Danmörku. Einnig hefur Jón Páll verið stundakennari í Listaháskóla Íslands og haldið vinnustofur hér heima og víða á Norðurlöndunum.
HÉR er hægt að skoða íbúðina nánar.