Tónlistarmaðurinn Dr. Dre seldi nýverið glæsihús sitt og fékk um 3,99 milljarða króna í vasann fyrir eignina. Dr. Dre, sem þarf víst ekki að lepja dauðann úr skel, hefur grætt á tá og fingri bæði með tónlistinni og einnig á heyrnartólunum Beats By Dre sem hann hannaði og setti á markað árið 2008.
Dr. Dre er greinilega stálheppinn því hann keypti sjálfur húsið á rétt rúma tvo milljarða árið 2012 en fékk svo helmingi meira fyrir það þremur árum seinna. Frá þessu er greint á heimasíðunni Curbed.com.
Í húsinu, sem er í Hollywood, eru sex svefnherbergi, níu baðherbergi og vínkjallari svo eitthvað sé nefnt. Á lóð hússins eru svo gestahús og sundlaug.
Húsið er glæsilegt og myndirnar tala sínu máli. Nánari upplýsingar og fleiri myndir má finna inni á Curbed.com.