Listamaðurinn Ásgeir Skúlason einn þeirra sem er með verk á sýningunni #KOMASVO sem stendur yfir út febrúarmánuð í Listasafni ASÍ. Verk Ásgeirs samanstendur af þremur ljósmyndum sem sýna hann sleppa Omaggio-vasa í gólfið.
„Verkið er viss ádeila á þessum gegndarlausa múgæsingi sem vill oftast myndast meðal Íslendinga þegar þeir verða að eignast eitthvað en vita kannski ekkert af hverju,“ segir Ásgeir sem ákvað að notast við bronslitaðan Omaggio-vasa þar sem allir fagurkerar landsins hafa undanfarið verið í eltingaleik við þann grip sem kom í takmörkuðu upplagi. „Vasinn er þá orðinn að stöðutákni fyrir þá sem náðu að eignast hann á sínum tíma.“
„Sumum finnst vasinn hallærislegur á meðan einhverjum öðrum finnst hann stórkostlegur.“ Ásgeir segir áhorfendur verksins geta túlkað verkið á ýmsa vegu. „Það er engin ein rétt og engin ein röng túlkun á verkinu. En svo má heldur ekki gleyma því að þó að ég tali um þetta verk sem ádeilu á múgæsing Íslendinga þá tók ég sjálfur þátt í þeim æsingi, að vísu svolítið seint en ég var í einhverju maníukasti að reyna verða mér úti um þennan vasa. Ég varð að fá hann. Að baki minni þörf bjó sennilega önnur hvöt en hjá öllum hinum.“
Braut hátt í 2.000 ára gamlan vasa
Verk Ásgeirs er bein tilvísun í eitt frægasta listaverk kínverska listmannsins Ai Weiwei, „Dropping a Han dynasty vase“. Það verk er frá árinu 1995. „Þar kýs Ai Weiwei að taka hátt í 2.000 ára gamlan kínverskan vasa og brjóta hann, alveg svipbrigðalaus. Það væri kannski of löng saga að ætla rekja þýðingu þess tiltekna verks í þaula, en í mjög stuttu máli þá lýsir það andófi listmannsins á félagslegri og pólitískri umgjörð Kína í dag og til að auka vægi þess enn frekar þá velur hann vasa frá Han-tímabilinu, en það eru einmitt Kínverjar af Han-kynstofni sem eru í yfirgnæfandi meirihluta og gegna flestöllum valdastöðum í Kína í dag.“
Titill verks Ásgeirs er „Æ neinei“. „Titillinn er aftur bein vísun í nafn Ai Weiwei en lýsir á sama tíma viðhorfi mínu þegar ég verð vitni á múgæsingi Íslendinga gagnvart því að verða að fá eitthvað, þá hugsar maður bara: „æ nei nei...“. Svo kemur eitthvað nýtt mánuði seinna sem allir verða að eignast og leikurinn heldur áfram,“ segir Ásgeir að lokum.