Sænski prinsinn hannar fyrir Stelton

Carl Philip Bernadotte, sonur Karls Gústavs Svíakonungs og Silvíu drottningar, hefur hannað nýja línu fyrir hið fræga fyrirtæki Stelton. Prinsinn er menntaður grafískur hönnuður og rekur hönnunarfyrirtækið Bernadotte & Kylberg ásamt félaga sínum, Oscar Kylberg.

Fyrirtækið Stelton er þekkt fyrir kaffikönnur sínar sem urðu algert möst á níunda áratugnum og svo komust þær aftur í tísku fyrir nokkrum árum. Nú er Stelton að breiða út anga sína og fá ferska hönnuði til liðs við sig og ber línan Stockholm merki um það. Þeir félagar sóttu innblástur í norræna náttúru þegar þeir hönnuðu línuna en í línunni eru vasar og skálar með fallegu munstri.

Það sem er sérstakt við þessa línu frá Stelton er að nýstárlegri framleiðslutækni er beitt. Í grunninn eru hlutirnir í línunni úr áli sem er húðað með glerungi sem síðan er skreyttur með grafík.

Stockholm-línunni hefur verið afar vel tekið og vann hún nýlega hin virtu Red Dot-verðlaun í flokki „high quality design“.