Hönnunarhöll framkvæmdastjóra Skeljungs til sölu

Framkvæmdastjóri Skeljungs, Ingunn Elín Sveinsdóttir, og eiginmaður hennar, Stefán Magnússon, hafa sett glæsilegt hús sitt á sölu. Húsið er afar smekklegt og fallega innréttað en hönnunarhúsgögn og listaverk prýða alla króka og kima hússins. Hönnuðurinn Rut Káradóttir sá um innanhússhönnunina.

Húsið er 320 fermetrar og stendur við Víðigrund í Kópavogi. Ásett verð er 89,9 milljónir, fasteignasalan Borg sér um söluna.

„Glæsilegt einbýlishús að Víðigrund 45, neðst í dalnum á mótum Kópavogs og Fossvogsdals, á einum veðursælasta stað höfuðborgarsvæðisins. Húsið er 320,7 fermetra steinsteypt hús á tveimur hæðum og tvöfaldur sérstæður bílskúr sem byggður var 2009. Að innan er húsið hannað af Rut Káradóttur innanhússarkitekt og allt sérstaklega glæsilegt,“ segir á fasteignavef mbl.is.

„Íbúðin sjálf er 274,2 fermetrar á tveimur hæðum og bílskúrinn er 46,5 fermetrar. Í húsinu eru fjögur svefnherbergi, rúmgott eldhús, borðstofa, stofa, hol, anddyri, þvottahús, hobbíherbergi, studio-íbúð og sérstæður bílskúr.“