Veitingastaðurinn Strikið á Akureyri var endurhannaður á dögunum. Mjúkir litir ráða nú ríkjum á staðnum og er hönnunin svolítið skandinavísk. Lúmex hannaði lýsinguna og er mikið lagt upp úr henni. Leifur Welding sá um endurhönnunina á Strikinu. Eigendur staðarins Heba Finnsdóttir og Róbert Häsler lokuðu staðnum 2. janúar en með góðu skipulagi og vinnusemi náðist að opna staðinn aftur 16. janúar. Það þykir mikið afrek að það hafi tekist. 

Mammoth-stólarnir eftir Knut Bendik Humlevik og Rune Krøjgaard njóta sín vel á staðnum en þeir eru handgerðir með viðarramma. Stólarnir eru bólstraðir með þykku efni sem er ákaflega vandað. Þessir stólar eru bæði þægilegir og smekklegir. Þessir stólar fást í Norr 11 en þaðan koma líka barstólarnir. Auk þess prýða húsgögn frá GÁ húsgögnum staðinn. 

Skipt var um gólfefni á Strikinu og kemur parketið frá Agli Árnasyni. 

„Þema staðarins hefur í raun ekki breyst mikið, við viljum halda í okkar faglegu þjónustu og framúrskarandi mat í nýju umhverfi. Við erum samt með breytingunum að vonast eftir því að ná upp smá svona „before-bar“ stemningu en við erum með happy hour hjá okkur á föstudags- og laugardagskvöldum milli kl. 22-24,“ segir Heba Finnsdóttir, eigandi Striksins.

„Hugsunin er að fólk geti fengið sér einn eða tvo drykki áður en skemmtistaðir bæjarins fá að njóta danshæfileika þinna,“ segir hún og brosir.