Ungstirnið og raunveruleikapían Kylie Jenner gerði sér lítið fyrir á dögunum og festi kaup á glæsilegu húsi í Hidden Hills-hverfinu í Kaliforníu.
Jenner hyggst þó ekki búa í húsinu, sem kostaði 4,5 milljónir Bandaríkjadala eða tæpar 527 milljónir íslenskra króna, heldur er það hugsað sem skrifstofuhúsnæði.
Húsið er ekkert slor, en það hefur að geyma fjögur svefnherbergi, fjögur baðherbergi, sundlaug og nuddpott. Á lóðinni er einnig að finna gestahús sem vinir stjörnunnar fá afnot af þegar þeir heimsækja hana.
„Hún breytti húsinu í algeran verðlaunagrip. Húsið hefur mikið verið gert upp og er alger sýningargripur,“ sagði fasteignasali stjörnunnar í viðtali við Us Weekly.