Leonardo DiCaprio selur slotið

Stórleikarinn Leonardo DiCaprio hefur sett glæsihús sitt í Malibu á sölu. Leikarinn keypti húsið árið 1998, skömmu eftir að hafa leikið í Titanic, og borgaði þá 1,6 milljónir Bandaríkjadala fyrir.

Leikarinn keypti húsið þó ekki fyrir sjálfan sig, því móðir hans Ermelin hefur haft afnot af glæsihýsinu líkt og fram kemur í frétt Daily Mail.

Verð eignarinnar hefur hækkað talsvert síðan DiCaprio festi kaup á henni hér um árið, en hann fer fram á 10,95 milljónir dollara, eða tæplega 1,3 milljarða íslenskra króna fyrir glæsihýsið.

Húsið er á besta stað á svokallaðri „milljarðamæringaströnd“ á Malibu og er útsýnið stórkostlegt. Nágrannarnir eru svo ekki af verri endanum, en auðkýfingarnir Larry Ellison og David Geffen eiga hús á sömu slóðum.

Húsið sjálft er í sjálfu sér ekkert slor, en það hefur að geyma þrjú svefnherbergi og tvö baðherbergi.