Smartland Mörtu Maríu | Heimili og hönnun | mbl | 21.9.2016 | 17:24

Hér hafa Pitt og Jolie búið í gegnum árin

Skötuhjúin festu kaup á glæsihýsi á Spáni fyrr í sumar. Ljósmynd / skjáskot Today

Hjónaskilnaður stórstjarnanna Brad Pitt og Angelinu Jolie er að setja allt á hliðina, en leikkonan sótti um skilnað frá Pitt á mánudaginn.

Um fátt annað hefur verið rætt í fjölmiðlum, enda skilnaðurinn fremur óvæntur. Jolie og Pitt hafa verið saman í tólf ár, og þar af gift í tvö. Þau eiga saman sex börn, og eru sannkallaðir heimsborgarar, enda hafa þau átt hús út um allar trissur.

Vefurinn Today tók saman lista yfir nokkur heimili sem hjónakornin hafa deilt í gegnum árin. Og segja má að eignirnar séu ekkert slor.

London
Fjölskyldan hefur undanfarið dvalið í London. Glæsihýsið er staðsett rétt við ána Thames, en það hefur að geyma átta svefnherbergi, innisundlaug og líkamsræktarsal. Leigan er eftir því, en hjónin hafa þurft að greiða 21 þúsund dollara á mánuði, sem samsvarar tæplega tveimur og hálfri milljón íslenskra króna.

Hús hjónanna í London er ekkert slor. Ljósmynd / skjáskot Today

New Orleans
Árið 2006 festu hjónin kaup á húsi í New Orleans. Húsið er allt hið glæsilegasta, en þar er að finna fallegan marmara, eldstæði og gólfsíða glugga.

Eignin í New Orleans er sérlega sjarmerandi. Ljósmynd / skjáskot Today

Provence
Jolie/Pitt hjónin hafa dvalið langdvölum í Frakklandi. Þar áttu þau sannkallaðan kastala, sem þau keyptu árið 2012 á 60 milljónir dollara. Húsið hefur að geyma 35 herbergi, margar sundlaugar, bíósal og þyrlupall. Þar gengu skötuhjúin einnig í hjónaband fyrir tveimur árum.

Franski kastalinn kostaði skildinginn. Ljósmynd / skjáskot Today

Hollywood
Höfuðstöðvar fjölskyldunnar í Hollywood eru í hverfinu Los Feliz. Pitt keypti húsið árið 1994, en hann er einnig sagður hafa keypt nærliggjandi byggingar til að skapa fjölskyldunni meira næði.

Fleiri eignir fjölskyldunnar má sjá hér.