Fataslár geta bjargað málunum

Allar áhugakonur (og jafnvel menn) um falleg föt lenda gjarnan í því vandamáli að fataskápurinn springur undan öllu góssinu. Þá eru góð ráð dýr. Flestir fatafíklar vilja nefnilega miklu frekar kaupa sér fleiri föt en að eyða peningum í að skipta fataskápnum út fyrir stærri skáp.

Þá koma fataslár eins og himnasending.

Til þess að fataslár njóti sín skiptir miklu máli að herðatrén séu falleg og helst samstæð og að flíkurnar sem hangi á fataslánni séu huggulegar. Teygðar trimmbuxur og útjaskaðar vinnuskyrtur geta truflað fegrunarskynið ef fatasláin á að prýða herbergið – ekki vera eins og eitthvert fataskrímsli upp við vegginn.

Þegar búið er að raða á fataslána skiptir máli að henda ekki fötum yfir hana þannig að hún verði eins og ofvaxið fatafjall í svefnherberginu.

Það sem er svo ansi gott við fataslár er að þær kosta í fæstum tilfellum mjög mikla peninga. Það er því hægt að taka til í fötunum sínum og gera fínt án þess að þjónustufulltrúinn þinn froðufelli. Verslanir eins og IKEA og Rúmfatalagerinn eiga fínustu fataslár og svo kemur Línan sterk inn með þessari flottu hönnun.

Ef fólk notar hugvitið sitt getur fataslá verið eins og listaverk eða í það minnsta stofustáss.