Hönnunarfyrirtækið Minarc sem er í eigu Íslendinganna Erlu Daggar Ingjaldsdóttur og Tryggva Þorsteinssonar hannaði þetta dásamlega hús sem hefur hlotið heimsathygli. Húsið er staðsett í Hollywood Hills í Los Angeles og var ekkert til sparað þegar það var hannað og byggt. Umfjöllun um þetta hús birtist hjá Interior Design Homes.
Hjónin Erla og Tryggvi, sem hafa verið búsett í Los Angeles í um eða yfir 20 ár, sérhæfa sig í hönnun á vistvænum húsum. Um er að ræða einingahús sem eru framleidd í Bandaríkjunum.
Hjónin hafa hlotið mörg hönnunarverðlaun fyrir verk sín en þau hönnuðu Ion hótelið á Nesjavöllum og eru nú að hanna hótel við Laugaveg sem mun opna síðar á þessu ári. Þau hanna ekki bara heilu húseignirnar heldur hanna þau húsgögn, ljós og annað sem prýðir heimilið.