„Við fluttum inn fyrir tveimur árum, en lítið hafði verið gert fyrir húsið fram að því. Það reyndist því nauðsynlegt að ráðast í endurbætur, en meðan á þeim stóð sváfum við öll á dýnum á gólfinu í einu herbergi. Það fyrsta sem við gerðum var að brjóta niður vegg og stækka eldhúsið. Lengi vel vorum við því ekki með eldhúsaðstöðu heldur notuðumst við lítinn ferðakæli og samlokugrill. Það voru því pantaðar ófáar pítsur á þessum tíma,“ segir húsfreyjan og bætir við að ástandið hafi ekki skánað þegar í ljós kom að ráðast þurfti í endurbætur á baðherberginu.

„Upphaflega ætluðum við ekki að taka baðherbergið í gegn. Það reyndist þó nauðsynlegt og vorum við því lengi vel hvorki með nothæft eldhús né baðherbergi. Sem betur fer er gestasnyrting í íbúðinni, auk þess sem Laugardalslaugin er í nágrenninu.“

Fjölskyldan flutti inn að hausti til, en eldhúsið var komið í gagnið skömmu fyrir jól. Baðherbergið var svo formlega tekið í gagnið á Þorláksmessu.

„Það var mikil gleði þegar þessum helstu framkvæmdum var lokið og við náðum jafnvel að halda matarboð hér á aðfangadag. Síðan höfum við hægt og rólega dundað okkur við að breyta og bæta. Íbúðin er að mestu leyti klár, þótt okkur langi að taka þvottahúsið og forstofuna í gegn seinna meir. Það verður þó að bíða betri tíma. Garðurinn er einnig úr sér vaxinn. Það verður eflaust verkefni næstu ára að koma honum í gagnið, enda erum við ekki með neitt sérlega græna fingur,“ segir húsfreyjan. En hvernig skyldi fjölskyldunni líða á nýja heimilinu?

„Það fer voðalega vel um okkur. Það er engu logið um að besta veðrið sé í Fossvoginum, garðurinn okkar snýr í hásuður og er sólríkur og notalegur. Við sjáum allavega ekki fram á að flytja okkur um set næstu árin.“