Sæbjörg Guðjónsdóttir innanhússhönnuður fékk það verkefni að endurhanna 114 m² íbúð í Grafarvogi. Í samráði við eigandann ákvað Sæbjörg að sprautulakka skápahurðir og skipta um eldhúsinnréttingu og gólfefni. Hún sá líka um að velja húsgögn inn í íbúðina.
Einnig var skipt um allar innihurðir þar sem þær voru með rauðleitum við sem hentaði ekki nógu vel. „Fataskápar fengu að halda sér en voru sprautaðir hvítir í herbergjum en svartir í forstofu. Allir veggir og loft voru svo máluð í mjög ljósgráum tón, lit sem ég hef verið að blanda í Slippfélaginu og hentar mjög vel ef þú vilt ekki hvíta veggi en mjög ljósa samt,“ segir hún.
„Hjónaherbergið var svo málað dökkgrátt. Eldhúsið sem var fyrir fékk að fara þar sem skipulagið hentaði ekki nógu vel. Þar sem eigandinn er kona með tvær dætur og son sem er eiginlega farinn að heiman var mín nálgun að hafa rýmin kvenleg og elegant en með sterka kontrasta í húsgagnavali.“
Eldhúsinnréttingin er úr IKEA og vildi Sæbjörg hafa eldhúsið allt svart. Eldhúsið er úr nýju eldhúslínunni úr IKEA sem er mött svört.
„Svo bættust við tvær fljótandi hillur sem voru sérsmíðaðar og sprautaðar svartar og reyklitaðir speglar voru settir á milli, sitt hvorum megin, til að endurkasta birtunni. Höldur voru einnig gerðar svartar svo sem minnst bæri á þeim. Þar sem eldhúsið er til hliðar við stofu fannst mér ekki þurfa að setja venjulegt eldhúsborð og því létum við útbúa barborð úr stáli sem var svo gert hvítt og svartir Afteroom-barstólar frá Menu settir við til að fá kontrastinn á móti.“
Í stofu og eldhúsi er stór gluggaveggur sem tengir rýmin saman. Úr stofunni er útgengi út á pall. Sæbjörg lét sérsauma hvítar gólfsíðar hörgardínur sem ná yfir allt.
„Þannig nær birtan að komast í gegn en áferðin frá efninu skapar hlýleika á móti hreinum línum og svörtu eldhúsi. Hangandi ljósin yfir barborði eru svo frá Lýsingu og hönnun. Í stofunni er hetjan svo stórt málverk eftir Baltasar sem endurspeglar litapallettuna sem er gegnumgangandi í íbúðinni. Sófinn og hliðarborðið er frá Heimili og hugmyndum. Púðarnir eru frá Vigt. Við þetta er svo Bowl-borðið frá Mater og Cuba Easy Chair frá Carl Hansen. Stór motta úr Ilvu tengir rýmið svo saman. Í borðstofu er svo stórt hringborð frá Vigt, leðurstólar frá Tekk og Dahl-ljósið er frá Northern Lighting. Í sjónvarpsrými er blár flauelssófi frá Ilvu og gangborðið er frá Húsgagnahöllinni. Stóri spegillinn í anddyri er Circum-spegill frá Módern. Í hjónaherbergi eru náttborðin frá Epal og lamparnir frá IKEA. Lýsingin í íbúðinni var ekki nógu góð og því voru teknar kastarabrautir og sívalningsljós frá S. Guðjónsson.Í þessu verkefni fannst mér mikilvægt að hafa rýmin frekar ljós þar sem birtan er ekki mikil en skapa kontrasta á móti. Mér fannst einnig mikilvægt að eldhúsið yrði svona dökkt og dramatískt. Það hefði orðið frekar flatt ef það hefði bara verið hvítt.“