Það getur verið vandasamt að innrétta lítil rými en þegar vel tekst til tekur enginn eftir því hvort rýmið er 60 fermetrar eða 110. Bobby Berk úr þáttunum Queer Eye á Netflix greindi frá nokkrum góðum ráðum þegar kemur að minni rýmum á vef Elle Decor.
Mistök
Berk segir algengt að fólk vilji brjóta lítil rými upp í nokkur minni rými til þess að láta þau virka stærri, þetta séu hins vegar mikil mistök. Betra er að láta sama stílinn ráða í öllu rýminu. Í löngu og mjóu rými sé til dæmis gott að notast við sömu litina og munstrin.
Í stað þess að nota þung og dökk húsgögn til þess að gera rýmið notalegra mælir hann með ljósum húsgögnum með hreinum línum.
Litir
Það skiptir ekki bara máli að nota sama litinn heldur skiptir litavalið ekki síður máli. Mælir Berk með með ljósum og hlutlausum litum.
Ef ekki á að rífa niður veggi
Íbúðir virðast oft minni þegar þær eru hólfaðar niður með veggjum. Ef fólk vill komast hjá því að rífa niður þessa veggi er til dæmis hægt að skipta út einhverjum hurðum fyrir hurðir með gleri.
Geymslupláss
Þegar skortir geymslupláss er gott að eiga húsgögn sem nýtast einnig með hirslur eins og stofuborð með skúffum. Í svefnherberginu er hægt að geyma dót eða föt sem ekki eru notuð það oft undir rúminu auk þess sem náttborð með skúffum eru góð. Berk mælir þó með að fólk hendi hlutum sem þjóni ekki lengur tilgangi, jafnvel þó svo að hlutirnir hafi tilfinningalegt gildi.