Fiskur og ferskmeti fara vel saman: Grafinn lax í rauðrófum
Elín Albertsdóttir elal@simnet.is
Ferskar rauðrófur eru ákaflega hollar og góðar. Margir nota þær í heilsudrykki til að fá úr þeim allt það vítamín sem þær innihalda. Rauðrófur gefa sterkan lit og þær henta því vel til að lita mat. Ef þú vilt fá rauðan fallegan lit á reyktan lax má leggja hann í „bleyti“ í rauðrófusafa og marinera hann. Skemmtilegt ráð til að gera matardiskinn litríkan.
Hér er uppskrift að ferskum laxi sem er grafinn í rauðrófum.
1 laxaflak
150 g sykur
100 g gróft salt
3 ferskar rauðrófur, rifnar niður með rifjárni
3 appelsínur, rifinn börkur og safinn
Graslaukur
Nokkur Allrahanda fræ (allspice)
1) Laxaflakið á að vera beinlaust og roðið hreisturslaust.
2) Dreifið sykri og salti yfir fiskinn. Setjið önnur hráefni í botninn á bakka og leggið fiskinn ofan á blönduna, roðið á að snúa upp. Marinerið í 8-12 tíma.
3) Takið flakið úr blöndunni og skerið það í mjög fínar roðlausar sneiðar, eins og graflax er skorinn. Leggið fallega á disk og vætið með sinneps- og límónu vinaigrette.
