Þetta er ekta vetrarsúpa, matarmikil og bragðgóð. Blómkál hentar afskaplega vel til súpugerðar og þroskaður og fínn Cheddar-ostur fullkomnar súpuna  ásamt sítrónuberkinum.

• 1 blómkálshaus
• 1 púrrulaukur
• 3-4 hvítlauksgeirar
• 1 bökunarkartafla
• 5 dl kjúklingasoð
• 2,5 dl mjólk
• 1 dós sýrður rjómi 18%
• rifinn börkur af einni sítrónu
• 100 g þroskaður Cheddar-ostur
• 25 g smjör
• olía

3 lárviðarlauf og nokkrir timjanstönglar bundnir saman í kryddvönd

Skerið púrrulauk í litlar sneiðar og fínsaxið hvítlaukinn. Skerið blómkál og kartöflu niður í bita.

Hitið smjör og olíu í þykkum potti og mýkið púrrulauk og hvítlauk. Bætið kartöflu og blómkáli saman við og steikið í um fimm mínútur. Bætið þá mjólk og kjúklingasoði saman við ásamt kryddvöndinum. Látið suðu koma upp og leyfið að malla í 20-25 mínútur. Maukið í matvinnsluvél eða með töfrasprota.

Bætið sýrða rjómanum út í pottinn og sítrónuberki og þeytið vel saman. Rífið ostinn og hrærið saman við.

Setjið í skálar og skreytið með rifnum osti og sítrónuberki og Cayennepipar.

Fleiri súpuuppskriftir finnið þið hér. 

Uppskrift: vinotek.is