Fylltar paprikur eru réttur sem er vinsæll hjá öllum kynslóðum. Þetta er sígild fylling með hakki og hrísgrjónum sem að við gerum bragðmeiri með tómatasósu, kryddjurtum og parmesanosti.

Byrjið á því að gera tómatasósuna:

• 1 dós tómatar
• 1 laukur saxaður
• 2 vænir hvítlauksgeirar
• nokkur basilblöð
• óreganó, ferskt eða þurrkað
• skvetta af hvítvíni ef þið eigið það til

Mýkið lauk og hvítlauk í olíu íu á pönnu. Bætið tómötunum út á pönnuna og leyfið þeim að malla í smástund ásamt skvettu af hvítvíni. Bætið kryddjurtunum saman við. Látið malla áfram þar til að tómatarnir maukast þegar ýtt er á þá með skeið.

Fyllingin:

• 2 dl hrísgrjón
• 500 g nautahakk
• 1 laukur saxaður
• 3 hvítlauksgeirar, saxaðir
• 1 paprika, söxuð
• 1 búnt steinselja, söxuð fínt
• 1 lúka rifinn parmesanostur
• 1/3 Fetakubbur, skorinn í litla teninga
• 1 dl af tómatasósunni
• salt og pipar

Setjið 2 dl af hrísgrjónum í pott og sjóðið.

Hitið olíu á pönnu og mýkið lauk, hvítlauk og papriku. Bætið kjötinu út á, hækkið hitann aðeins og brúnið í 5 mínútur eða svo. Bætið nú steinseljunni út á og hrærið vel saman. Bætið næst tómatasósunni saman við og hrísgrjónunum. Takið af hitanum og hrærið parmesanostinum og fetaostinum saman við. Bragðið til með salti og pipar.

Skerið paprikur í tvennt og hreinsið fræ og ljósa ávaxtakjötið innan úr þeim. Setjið afganginn af tómatasósunni í fat. Fyllið paprikurnar vel af kjötblöndunni og raðið ofan í fatið.

Setjið álpappír ofan á fatið og eldið í 45 mínútur í 200 gráðu heitum ofni. Takið álpappírinn af og eldið í 30 mínútur til viðbótar.

Fleiri uppskriftir með papriku finnið þið með því að smella hér. 

Uppskrift: vinotek.is