Bragðgóður byggréttur með nýju grænmeti, rækjum og lauk

Hráefni

» 200 g bankabygg

» 250 g blandað nýtt grænmeti

» 1/2 ltr. grænmetiskraftur

» ½ stk. laukur

» 1 stk. hvítlauksgeiri

» 1 búnt ferskt kóríander

» blandaðar kryddjurtir

» 1/2 glas þurrt hvítvín

» 2 msk jómfrúarólífuolía

» 20 g smjör

» salt og hvítur pipar

» 100 g rækjur

» 1 dós skyr

Fyrir 2 - 4

Íslenska byggið er til margra hluta nýtilegt í eldamennskunni. Það er hollt og sérlega gott. Gunnar Karl Gíslason á Dilli sýnir okkur hvernig má slá í gegn með einföldum byggrétti.

Aðferð

Leggið bankabyggið í bleyti í 6-8 tíma. Skolið grænmetið og skerið í bita. Saxið lauk smátt, hvítlauk og kóríanderlauf. Hitið olíuna og mýkið laukinn og kóríander í henni. Síið vatnið vel frá bankabygginu og bætið út á pönnuna og ristið ásamt grænmetinu í 3-4 mín. Hellið víni saman við og látið gufa upp. Smakkið til með saltinu. Hellið tveimur ausum af sjóðheitum kraftinum út á pönnuna og látið gufa upp á milli þess sem vökva er bætt í. Þegar byggið hefur kraumað í 10 mín. bætið kryddjurtum saman við og sjóðið áfram í um 5 mínútur. Þegar byggið er soðið, bætið þá smjörklípu út á pönnu og blandið vel saman. Kryddið með ferskum pipar rétt áður en rétturinn er borinn fram og skreytið með ferskum birkilaufum. Látið meðlæti ofan á byggið, má nota það sem er við hendina hverju sinni.

Sósan er samsett úr skyri, rjóma, ögn af góðu ediku ásamt salti og pipar. 

Þessi uppskrift er notuð í Sumarlegt byggsalat með vorgrænmeti og villtum kerfli

Meðlæti