Pepperoni- og grænpiparbrauð

Hráefni

» 500 g hveiti

» 100 g heilhveiti

» 4 tsk. þurrger, sléttfullar (eitt bréf)

» 1 tsk. lyftiduft, sléttfull

» 4 msk. sykur, sléttfullar

» 70 g smjör

» 1-1/2 dl mjólk, ylvolg

» 1-1/2 dl vatn, ylvolgt

» 1 dl súrmjólk

» 100 g mozarellaostur

» 1 stk. egg

» 100 g pepperoni

» 2 msk. grænn pipar, niðurlagður, steyttur

Aðferð

Leysið gerið upp í mjólkinni. Látið standa í 5 mín. Blandið öllum þurrefnum saman í skál, bætið síðan gerblöndu, súrmjólk, vatni, smjöri, eggi, rifnum osti, pipar og pepperoni í strimlum saman við. Hnoðið í 5 mínútur. Mótið snittubrauð og skerið niður í 15-20 stk. 2 cm þykkar sneiðar eða hleifa. Setjið á smurða bökunarplötu, skerið tvær raufar í hvern hleif og látið hefast við stofuhita í 20 mínútur. Bakið við 200°C í 20 mínútur. Gott er að skvetta 1 dl af vatni í ofnbotninn um leið og ofninum er lokað.

Einnig er hægt að skipta deiginu í tvennt og baka tvö 500 g snittubrauð eða eitt stórt brauð (1000 g). Snittubrauðin þurfa að hefast í 30 mínútur og bakast í 25-30 mínútur við 200°C, eitt stórt brauð þarf að hefast í 35 mínútur og bakast í aðrar 35 mínútur við 200°C.