Hrísgrjón og skelfiskur með piparrót og sinnepsrjóma

Hráefni

» 250 g basmati hrísgrjón

» 1 stk. laukur

» 3 msk. matarolía

» 8 dl kjúklingasoð (vatn og teningur)

» 1 msk. piparrót (fæst maukuð í pökkum)

» 3 msk. dijon sinnep

» 2 dl rjómi

» 6 msk. graslaukur

» 400 g kínahreðkur

» Steiktur hörpuskelfiskur

» 800-1000 g hörpuskelfiskur

» 3-4 msk. heilhveiti

» 6 msk. olía til steikingar

» 2-3 msk. smjör til steikingar

» salt og pipar

» Djúpsteikt piparrót

» 50-60 g piparrót í strimlum (lítill biti eða 1 stk., fæst í litlum stykkjum)

» olía til djúpsteikingar

Fyrir 4

Aðferð

Saxið lauk og léttsteikið með hrísgrjónum og piparrót í olíu. Bætið kjúklingasoðinu út í og látið sjóða undir loki í 10 mín. Að því loknu er rjómanum bætt við, og soðið í aðrar 10 mín., einnig undir loki. Hrærið reglulega í blöndunni. Þegar hrísgrjónin eru fullelduð er sinnepinu blandað saman við þau. Fyllið 8 cm. form eða víða bolla með hrísgrjónum, pressið vel niður. Hvolfið á hvern disk, stráið saxaðri kínahreðku- og graslauksblöndu í kringum formið og dragið það upp af grjónunum.

Höpuskelfisknum er velt upp úr heilhveitinu, bragðbætið með salti og pipar úr kvörn. Hitið olíu og smjör á pönnu og snöggsteikið í 1-2 mínútur. Skelfisknum er síðan raðað í kringum hrísgrjónakökuna.

Skerið piparrótina í strimla. Djúpsteikið þar til hún er stökk. Látið feitina renna af á smjörpappír eða servíettu og leggið síðan yfir hrísgrjónakökuna þegar rétturinn er borinn fram.

Ef djúpsteikingarpottur er ekki fyrir hendi má djúpsteikja í venjulegri steikarpönnu. Hafið hana hálffulla af olíu og steikið í henni vel heitri. Farið varlega - brennandi heit feiti er hættuleg!

Meðlætinu stráð í kringum hrísgrjónakökuna ...

... áður en formið er dregið upp.