Laxa- og lúðurúlla með kryddjurtum

Hráefni

» 500 g laxaflök, roðflett og beinlaus

» 300 g smálúðuflök, roðflett og beinlaus

» 500 g gróft salt

» svartur pipar úr kvörn

» 6-8 tsk. matarlímsduft

» 1 pottur graslaukur, ferskur

» 30 g steinselja, fersk

» 4 msk. Provence krydd (frá Pottagöldrum)

» álpappír

» Tómatedikssósa (vinaigrette)

» 1/2 dl kjúklingasoð

» 1-2 tsk. tómatmauk

» 1/2 dl matarolía

» 1 dl rauðvínsedik

» 1 stk. laukur

» salt og pipar úr kvörn

Fyrir 6 - 8

Aðferð

Þekið lax og lúðu með grófa saltinu og svarta piparnum í fimmtán mínútur. Skolið þá fiskinn og þerrið. Stráið söxuðum graslauk, kryddi og matarlímsdufti á álpappírsörk. Leggið laxaflakið yfir með roðhliðina upp, örlítið matarlímsduft yfir og leggið síðan lúðuflakið yfir laxinn. Stráið þunnu lagi af matarlímsdufti þar yfir. Vefjið upp í rúllu og lokið vel í báða enda. Hitið bakarofn í 150°C og setjið í hann eldfast mót með vatni. Leggið laxarúlluna í vatnið og bakið í 15 mínútur, snúið rúllunni a.m.k. einu sinni. Tekið úr ofninum og kælt í 12-15 klst. Skerið rúlluna í sneiðar og berið fram með sósunni. Með þessu má einnig bera fram salat og ristað brauð.

Blandið öllum efnum saman í matvinnsluvél og maukið. Berið fram strax.

Leggið saman lax og lúðu. Jafnið endana.

Stráið kryddi og matarlímsdufti á álpappír.

Leggið laxaflakið ofan á og matarlímsduft yfir.

Lúðuflakið kemur næst, einnig matarlímsduft þar yfir.

Vefjið flökunum upp ...

... og vefjið álpappír að lokum utanum.