Bakaðar perur með kanilstöngum

Hráefni

» 160 g smjördeig (í tveimur 80 g plötum)

» 2 stk. perur, nýjar

» 4 stk. kanilstangir

» Enskt eggjakrem

» 7 stk. eggjarauður

» 75 g sykur

» 5 dl mjólk

» 1 dl rjómi, léttþeyttur

» 1-2 tsk. vanilludropar

» Meðlæti

» 1 l vanilluís

Fyrir 4

Aðferð

Skerið smjördeigsplöturnar í tvennt og setjið á smurða bökunarplötu. Afhýðið perurnar, skerið í tvennt og fjarlægið kjarnann (með teskeið). Skerið grunnar rákir þvert á perurnar. Leggið peruhelmingana á smjördeigið og kanilstangirnar ofan á. Bakið í 15-20 mínútur við 200°C.

Þeytið saman eggjarauður og sykur. Hitið mjólkina og hellið út í ásamt vanilludropum. Hrærið í með sleif þar til kremið þykknar. Gætið þess að ekki sjóði.

Hellið kreminu yfir í aðra skál á meðan það er að kólna og hrærið í öðru hvoru.

Léttþeytið rjómann og blandið honum saman við kremið þegar það er orðið kalt. Setjið kremið á diskana, bökuðu perurnar ofan á og berið fram með vanilluís í kúlum.

Veljið stórar, þroskaðar perur. Einnig er hægt að nota niðursoðnar perur. Þá er óhætt að frysta réttinn óbakaðan.